"Real" himoyachisi Rafael Varan mavsumoldi tayyorgarlik jarayonidagi salbiy natijalardan xavotir olmaslik kerakligini ta’kidladi.

Eslatib o‘tamiz, "qaymoqranglilar" 4ta nazorat o‘yinini o‘tkazib, ulardan 3tasida yutqazdi. "Arsenal" bilan o‘yin durang bilan yakunlanib, madridliklar penaltilar seriyasida g‘alaba qozonishgan edi.

"Muxlislar bizdan nima kutayotganini yaxshi tushunaman. Shuni aytishim mumkinki, ham jismonan, ham taktik jihatdan kuchli bo‘lish uchun sidqidildan ishlayapmiz. Xotirjamlikni va o‘zimizga bo‘lgan ishonchni saqlab qolishimiz kerak. Xatolarni to‘g‘rilaymiz. 2017 yilda ham "Real" mavsumoldi yig‘inni shunday boshlab, keyinchalik bir nechta sovrinni qo‘lga kiritgan edi. Mavsum boshlanishiga qadar tayyor bo‘lamiz. Zidan xavotirga tushayotgani yo‘q. U bizni xotirjamlikka chorlamoqda. Nimalarga qodirligimizni yaxshi bilamiz. Zidan nima qilayotganini biladi", - dedi Varan "Marca" nashriga bergan intervyusida.

"Real" mavsumdagi dastlabki o‘yinni 18 avgust kuni "Selta"ga qarshi o‘tkazadi.