Coca Cola Superliganing 15-turidan o‘rin olgan «Bunyodkor» - «Surxon» (3:0) uchrashuvidan keyin o‘tkazilgan matbuot anjumanining ikkinchi qismida mezbonlar ustozi Vadim Abramov ishtirok etdi.

- Albatta qiyin uchrashuvni o‘tkazdik. Bunday ob-havoda o‘ynash osonmas. Buning uchun yigitlarga rahmat aytaman! Umumiy ma’noda bugun haqli ravishda g‘alabaga erishdik, deb o‘ylayman. Biz chiroyli o‘yin namoyish qilishni va bu orqali ishqibozlarni stadionga qaytarishni o‘ylaymiz. Afsuski, bunday issiqda tribunada o‘tirib, shunchaki futbol tomosha qilish ham oson emas. Umid qilamizki, «Bunyodkor» stadionida o‘ynashni boshlasak, ishqibozlarga ham qulaylik bo‘lardi.

Jaloliddinovning asosiy tarkibda o‘ynamayotgani raqobatda yutqazayotgani bilan bog‘liq emas. Shunchaki, biz ikkinchi davradan boshlab boshqacharoq taktikadan foydalanyapmiz. Shu bois, Jasurning pozisiyasida boshqa o‘yinchini o‘ynatyapmiz. Aslida Jasur hali yosh, kelajagi porloq futbolchi. Shundoq ham yosh bo‘lishiga qaramasdan kattagina yuklamalar olyapti.

Har uch kunda o‘ynayotganimiz ochig‘i, meni biroz o‘ylantiryapti. «Qizilqum» kecha o‘ynagandi, biz bugun maydonga tushdik. O‘zbekiston Kubogida ham oldimizga maqsad qo‘yganimiz uchun «Qizilqum»ga qarshi Kubok o‘yinining ahamiyati yuqori. Shu bois, mazkur bellashuvga bugundan boshlab tayyorgarlik ko‘ramiz.