Osiyo Elit chempionlar ligasi musobaqasi oljidan hujum chizig‘ini kuchaytirayotgan «Paxtakor» klubi Iroq milliy terma jamoasi hujumchisi Ayman Husaynni o‘z tarkibiga qo‘shib oldi.

Ayman Husayn 1996 yilning 22 mart sanasida Iroqning Kirkuk viloyatida tavallud topgan.

U professional faoliyatining dastlabki yillarini Iroq chempionatida o‘tkazgan. Hujumchi «Duhok», «Al-SHorta», «Al-Naft» va «Al-Quva al-Joviya» kabi mamlakatning yetakchi klublari safida to‘p tepgan.

Keyingi yillarda futbolchi faoliyatini xorijda davom ettirdi. Ayman Husayn Tunis, Qatar, Birlashgan Arab Amirliklari va Marokash chempionatlarida to‘p tepdi. Hujumchi faoliyati davomida «Sfaksen», «Umm-Salal», «Al-Marhiya» va «Raja Kasablanka» kabi klublar sharafini himoya qilgan.

Ayman Husayn Iroq milliy terma jamoasining asosiy hujumchilaridan biri hisoblanadi. U 2023 yilgi Osiyo kubogida 4 ta uchrashuvda 6 ta gol kiritib, musobaqaning eng sermahsul futbolchilaridan biri bo‘ldi. Xususan, Yaponiya bilan uchrashuvda dubl qayd etib, Iroqning 2:1 hisobidagi g‘alabasiga katta hissa qo‘shdi.

Tajribali hujumchi 2026 yilgi Jahon chempionatida ham Iroq terma jamoasi safida maydonga tushib, Norvegiya darvozasini ishg‘ol qilishga muvaffaq bo‘ldi. Bu gol Iroq futboli uchun tarixiy ahamiyat kasb etdi. Sababi, Iroq terma jamoasi bungacha Jahon chempionatining final bosqichida so‘nggi bor 1986 yilda gol kiritgan edi. O‘shanda Ahmed Radhi Belgiya bilan uchrashuvda Iroqning mundiallar tarixidagi ilk goliga mualliflik qilgan edi. Shu tariqa, Ayman Husayn 40 yillik tanaffusdan so‘ng Iroq terma jamoasi safida Jahon chempionatida gol urgan dastlabki futbolchiga aylandi.

Shuningdek, Ayman Husayn Iroq olimpiya terma jamoasi tarkibida 2024 yilgi Parij Olimpiadasida ham ishtirok etgan. Hujumchi musobaqa davomida Ukraina va Argentina terma jamoalari darvozasini ishg‘ol qilishga muvaffaq bo‘lgan.