Tailandda bo‘lib o‘tayotgan futzal bo‘yicha klublar o‘rtasida Osiyo chempionatida guruh bosqichi yakuniga yetib bormoqda. Unda ishtirok etayotgan O‘zbekiston chempioni — AGMK guruhning 3-turi doirasida Qatarning "Ar-Rayyan" klubiga qarshi bahs olib borib, g‘alaba qozondi.

O‘yin gollarga boy bo‘ldi. Uchrashuvning ilk daqiqasidayoq qatarliklar gol urishga muvaffaq bo‘lishdi. Oradan ko‘p o‘tmasdan olmaliqlar ikkita gol bilan oldinga o‘tib olishdi. "Ar-Rayyan" qarshi hujumda tenglashtirgan bo‘lsa, Petrov shogirdlari tanaffusga qadar 3ta gol urib, 5:2 hisobida oldinga o‘tib oldi.

Vakillarimiz bu hisobdan xotirjamlikka berilishdi shekilli, ikkinchi bo‘limning dastlabki yarmini bo‘sh o‘tkazishdi. Natijada dohaliklar ketma-ket 3ta gol urib, muvozanatni tiklab qo‘yishdi.

Shundan so‘ng AGMK o‘yinga jiddiy yondasha boshladi. O‘zbekistonliklar keyingi daqiqalarda uyushtirgan hujumlarning ikkitasini samarali yakunlab, g‘alabani o‘z tomonlariga og‘dirishdi — 7:5. Darvoqe, o‘yin so‘ngida qatarliklar darvozamiz tomon belgilangan dabl-penaltidan foydalana olishmadi — to‘p ustunga tegib qaytdi.

Shu tariqa, AGMK guruhda 6 ochko bilan pley-off yo‘llanmasini qo‘lga kiritdi. Guruh g‘olibligi esa Vyetnamning "Tay Son Nam"ga nasib etdi (9 ochko). Jamoamiz chorak finalda katta ehtimol bilan musobaqa mezboni — "Port" futzal klubiga qarshi maydonga chiqadi. Chorak final o‘yinlariga 14 avgustga belgilangan.

Futzal. Klublar o‘rtasida Osiyo chempionati, «B» guruhi, 3-tur.
"Ar-Rayyan" (Qatar) — AGMK (O‘zbekiston) - 5:7
Gollar: Tohiriy (1, 25), Safari (11, 23, 24) — Davron Choriyev (3, 13), Ilhomjon Hamroyev (5), Akbar Usmonov (17, 18), Husniddin Nishonov (28), Ixtiyor Ropiyev (35)
"Ar-Rayyan" — 1. Abdulrahmon al-Qahton, 12. Ahmad Xalil, 13. Ali al-Ajmi, 2. Maaz Yusuf, 3. Saad al-Mohannadiy, 4. Muborak al-Jarboiy, 5. Said al-Bulushi, 6. Muhammad Safariy, 7. Muhammad Tohiriy, 8. Abdulrahmon al-Yafiy, 9. Xazem Sami Salim, 10. Abdulloh Salim, 11. Rashid al-Boinin, 14. Muborak al-Muhaza.
AGMK (dastlabki beshlik): 1. Rustam Umarov (darvozabon), 4. Ixtiyor Ropiyev, 5. Ilhom Hamroyev, 6. Husniddin Nishonov, 7. Dilshod Rahmatov.
Zaxiradagilar: 2. Abbosbek O‘lmasbekov (darvozabon), 3.  Mashrab Odilov, 8.Davron Valijonov, 9. Alan Aminov, 10. Akbar Usmonov, 11. Timur Berdiyev, 12. Davron Choriyev, 13. Islombek Biyturayev, 14. Anasxon Rahmatov.