Professional boksning super yarim o‘rta (-69,85 kg) vazn toifasida ringga chiqayotgan Isroil Madrimov (3-0, 3 KO) oktyabr oyida o‘zining to‘rtinchi jangini o‘tkazadi. Bu haqda GoSport.uz internet-nashri ishonchli manbalari ma’lum qildi.
Unga ko‘ra, Madrimov 5 oktyabr kuni Nyu-Yorkdagi mashhur Madison Square Garden arenasida bo‘lib o‘tadigan boks oqshomida ringga ko‘tariladi. Hozircha unga kim raqiblik qilishi noma’lum. Isroil shu kuni o‘zining WBA Intercontinental chempionlik kamarini himoya qiladi.
Mazkur boks oqshomining markaziy jangida qozog‘istonlik afsonaviy bokschi, 4ta yo‘nalish bo‘yicha sobiq jahon chempioni Gennadiy Golovkin (39-1-1, 34 KO) ringga chiqadi. Golovkin shu kuni ukrainalik Sergey Derevyanchenkoga (13-1, 10 KO) qarshi vakant qoldirilgan o‘rta vazn (-72,58 kg) IBF chempionlik kamari uchun ringga chiqadi. Jang DAZN internet-platformasi orqali translyasiya qilinadi.
Eslatib o‘tamiz, Isroil Madrimov professional boksda so‘nggi marta 8 iyun kuni aynan Golovkin bilan bitta boks oqshomida ishtirok etib, meksikalik Norberto Gonsalesga (24-13, 13 KO) qarshi ringga chiqqan va raqibini texnik nokaut evaziga mag‘lub etgandi.
