Coca Cola Superliganing 17-turidan o‘rin olgan «Bunyodkor» - «Metallurg» (1:0) uchrashuvidan keyin o‘tkazilgan matbuot anjumanining ikkinchi qismida mehmonlar ustozi Andrey Shipilov ishtirok etdi.

- «Bunyodkor»ning «Nasaf»ga qarshi o‘yinini ko‘rib chiqqandik, mezbonlarning kuchli va kuchsiz tomonlarini yaxshi bilardik. Maydon egalarining boshlang‘ich tarkibida Tursunov va Gadoyevni ko‘rib, biroz hayron qoldim. Biz o‘zimizning taktikamiz va strategiyamizga 75-daqiqa rioya qildik. To‘g‘ri, mezbonlar to‘p nazorati bo‘yicha ustunlik qildi. Lekin golga qadar darvozamiz oldida aytarli jiddiy hujum tashkil qilinmadi. Markazda juda zich va bexato o‘ynadik. Besh nafar himoyachi bilan harakat qilgan bo‘lsak-da, qarshi hujumlarda bizda yaxshiroq imkoniyatlar bo‘ldi. O‘tkazib yuborilgan golda ozgina «konsentrasiya» yetishmadi. G‘iyosovning individual mahorati o‘yin taqdirini hal qildi. Xurshid o‘sha vaziyatda juda nozik harakat qildi. Natija adolatli! «Bunyodkor»ni g‘alaba bilan tabriklayman!