Mamlakat milliy chempionatining 18-turida "Metallurg" o‘z maydonida Namanganning "Navbahor" jamoasini qabul qiladi. Mazkur jamoalar bugungacha kuchlilar safida 45 marta to‘qnash kelishgan. Bugungacha ortda qolgan o‘yinlarning 12 tasida bekobodliklar g‘alaba qozonishgan bo‘lishsa, 20 bahsda vodiyliklar zafar quchishgan. 13 ta uchrashuvda tomonlar murosa ko‘chasini tanlashgan. Ochkolarni baham ko‘rishgan. Kiritilgan va o‘tkazib yuborilgan to‘plar nisbatidagi farq raqiblarimiz foydasiga – 46:65. Ushbu jamoalarning o‘zaro qarama-qarshiliklaridagi eng yirik hisob 2003 yili qayd etilgan. O‘shanda “Metallurg” «Navbahor»ga 0:7 hisobida imkoniyatni boy berib qo‘ygan. Bu bekobodliklarning oliy liga bahslaridagi ham eng yirik mag‘lubiyati hisoblanadi. Uch mavsum muqaddam “Metallurg” “Navbahor”ni 5:1 hisobida dog‘da qoldirib, bu jamoalar to‘qnashuvidagi yirik g‘alabasini rasmiylashtirdi. Ungacha bekobodliklar “Navbahor”ni muqaddam uchta to‘p farqi bilan yutgandi.
Bu yilgi mavsumda jamoalarning Namanganda o‘tgan o‘yinida hisob ochilmagandi – 0:0.

Jamoalarning Bekobodda o‘tkazilgan so‘nggi beshta uchrashuvi:

2018 “Metallurg” – “Navbahor” – 1:0
2018 “Metallurg” – “Navbahor” – 0:0
2017 “Metallurg” – “Navbahor” – 0:0
2016 “Metallurg” – “Navbahor” – 5:1
2015 “Metallurg” – “Navbahor” – 2:3

Tanishing, raqibimiz: “Navbahor” (Namangan)

“Navbahor” mamlakatimizning eng nomdor jamoalaridan biri hisoblanadi. Mustaqillik yillarida namanganliklar bir marta O‘zbekiston chempioni (1996) bo‘lishdi. Uch marta O‘zbekiston kubogini boshlari uzra baland ko‘tarishgan bo‘lishsa (1992, 1995, 1998), bir marta superkubok sohiblari ham bo‘lishgan (1999).

Shuningdek, “Navbahor” chempionatlarimizda 8 marta bronza medali bilan taqdirlangan va bu borada faqatgina Qarshining “Nasaf” jamoasidan ortda qolayapti, xolos.

Namangan shahrida futbol klubiga 1974 yilda asos solingan bo‘lib, u turli yillarda “Tekstilshik” (1974-80), “Avtomobilist” (1984-87) nomlari bilan yuritilgan. 1981-83 hamda 1988 yildan to hozirgi kungacha “Navbahor” nomi bilan o‘ynab kelayapti.

Jamoaning O‘zbekiston chempionatlaridagi to‘purari Shuhrat Mirxoldirshoyev hisoblanadi. U namanganliklar tarkibida o‘tkazgan 144 o‘yinida raqiblari darvozasiga 127 ta gol kiritgan. U faoliyati davomida jami 222 ta gol kiritib. Gennadiy Krasniskiy klubi a’zosi bo‘lgan.

“Navbahor” bugungacha O‘zbekiston chempionatlarida 799 ta uchrashuv o‘tkazib, shulardan 378 tasida g‘alaba qozongan. 154 o‘yinda durang qayd etib, 267 uchrashuvda yutqazgan.

Kiritilgan va o‘tkazib yuborilgan gollari nisbati 1351:975.

Chempionatdagi eng yirik g‘alabasi – 10:0 (2006 yil, “Xorazm”).

Yana bitta e’tiborga molik uchrashuv, bu sermahsul o‘yini – 10:3 (1996, “Kosonsoy”).

Eng yirik mag‘lubiyati – 0:7 (2009, “Paxtakor”).