"Barselona" klubi "PSJ" hujumchisi Neymarni qo‘lga kiritishga yaqin turibdi. Xo‘sh, mazkur transfer "ko‘k-anorranglilar"ga qancha tushadi? AS nashri jurnalistlari buni hisob-kitob qilib ko‘rishdi.

Braziliyalik futbolchi oylik maosh borasida talabini kamaytirsa ham (uning Fransiyadagi yillik maoshi 37 mln yevro), bu "Barsa" uchun katta ahamiyatga ega bo‘lmasligi mumkin. Soliqlar bilan qo‘shib hisoblaganda, kataloniyaliklar Neymar uchun bir yilda taxminan 60 mln yevro sarf qilf qilishadi. Besh yillik shartnoma uchun bu summa 300 mln yevroga yetadi. Bunga "Pari Sen-Jermen"ga to‘lanadigan 170 mln yevro transfer summasini qo‘shsa, bu son 470 mln yevroga yetadi.

Ammo bu hali hammasi emas. Futbolchining "Barselona"ga o‘tishi uchun agentlarga ma’lum mablag‘ to‘lanishi kerak bo‘ladi. Masalan, Neymar "PSJ"ga o‘tayotganida bu xarajat 50 mln yevroni tashkil qilgan edi. Shu tariqa, mazkur transfer uchun "Barsa" besh yil davomida 500 mln yevrodan ko‘proq pul sarflashiga to‘g‘ri keladi.

Tabiiyki, "Barselona"da buncha pul yo‘q. Jamoa Antuan Grizmanning transferi uchun 120 mln yevro atrofida kredit olishiga to‘g‘ri keldi. RAC 1 tarqatgan xabarga ko‘ra, "ko‘k-anorranglilar" yana bir marta qarz olishiga to‘g‘ri kelishi mumkin. Ammo kataloniyaliklarning ayni kunlardagi qarzi shundoq ham 200 mln yevroni tashkil qiladi.

Yana bir jihat. Hozirgi kunda jamoa yillik byudjetining (960 mln yevro) 62 foizini (595 mln yevro) futbolchilarning maoshiga sarflaydi. UYEFA halol o‘yin qoidasiga ko‘ra, ushbu ko‘rsatkich 70%dan oshib ketmasligi kerak. Neymarga to‘lanadigan maosh evaziga "Barsa" bu limitdan chiqib ketishi mumkin.