Ispaniya chempionatining 4-turi doirasida mavsum peshqadami "Atletiko" safarda "Real Sosyedad" mehmoni bo‘ldi.  "Anoeta"dagi bahsda "matraschilar" ushbu mavsumda ilk marta ochko yo‘qotdi.

Basklar o‘z uyilaridagi dastlabki o‘yinni yuqori ishtiyoq bilan o‘tkazishdi va kuchli raqibni mag‘lub etishdi. Ular birinchi bo‘limda golga tortadigan 3ta vaziyat yaratib, ulardan foydalana olishmadi.

Ikkinchi bo‘limda esa san-sebastyanliklar 3 daqiqa ichida ikkita gol urib, amalda o‘yin taqdirini hal qilib qo‘yishdi. E’tiborlisi, Nacho Monreal "Real Sosyedad" safida debyut uchrashuvida gol urdi.

Uchrashuvning so‘nggi daqiqalarida Simeone shogirdlari oldinga tashlanishdi. Ammo mezbonlar posboni Migel Anxel Moyya ikkita vaziyatda jamoani muqarrar goldan qutqarib oldi.

Shu tariqa, "Real Sosyedad" o‘z ochkolarini 7taga yetkazib, jadvalda 4-o‘ringa ko‘tarilib oldi. "Atletiko" esa mag‘lubiyatga qaramay, peshqadamlik qilishda davom etadi.

Ispaniya La ligasi, 4-tur
Real Sosyedad – Atletiko 2:0 (0:0, 2:0)
Gollar: 1:0 – 58 Edegor, 2:0 – 61 Monreal.
Real Sosyedad – Moyya, Monreal, Lyorente, Saldua, Elustondo, Edegor, Merino (Surutusa, 83), Oyarsabal, Subeldiya, Portu (Yanuzay, 83), Isak (Villian Joze, 73).
Atletiko – Oblak (Adan, 66), Ximenes, Savich, Lodi, Trippyer, Lemar (Lyorente, 46), Saul, Vitolo, Koke, Joau Feliks (Korrea, 57), Diyego Kosta.
Ogohlantirishlar: Subeldiya (45), Trippyer (51), Lyorente (60), Diyego Kosta (69).