«PSJ» hujumchisi Neymar bugun bo‘lib o‘tgan «Strasbur»ga qarshi o‘yinda (1:0) muxlislarning unga nisbatan munosabati haqida o‘z fikrlarini bildirib o‘tdi.
O‘yindan oldin ishqibozlar braziliyalik futbolchiga nisbatan hushtakbozlik qilishdi, uni haqorat qilishdi. O‘yinga qo‘shib berilgan daqiqalarda esa Neymar chalqancha uslubdagi zarba bilan jamoasiga g‘alaba keltirdi.
«Men muxlislarni tushunaman va ularga qiyin bo‘lganini bilaman. Lekin men «PSJ» o‘yinchisiman. Muxlislarga aytar gapim yo‘q. Men bunday hushtakbozliklarga o‘rganib qolganman.
Endi o‘zimni go‘yoki mehmonda o‘ynayotgandek his qilaman. Alamli, lekin ishqibozlarga qarshi yomon fikrga ega emasman.
Ketishni istaganimni barcha bilardi. Buning tafsilotlariga to‘xtalib o‘tirmayman. Sahifani yopdik. Men hozirda «PSJ» o‘yinchisiman va maydonda borimni berib harakat qilaman», – dedi Neymar.