Yevropa chempionlar ligasida "o‘lim guruhi" nomini olgan "H" guruhida "go‘sht" bo‘lishi kutilgan Chexiyaning "Slaviya" klubi ilk turda safardan ochko bilan qaytishga muvaffaq bo‘ldi.

Italiyaning "Inter" klubi favoritga xos ravishda tashabbusni o‘z qo‘liga oldi. Chexlar esa sabr bilan himoyalanishda, ba’zi vaziyatlarda darvozabon Kolarj mahorat ko‘rsatishiga to‘g‘ri keldi.

Ikkinchi bo‘lim o‘rtalariga kelib esa "Slaviya" hisobni ochishga muvaffaq bo‘ldi. Olis masofadan yo‘llangan zarba natijasida Xandanovich to‘pni qo‘lidan chiqarib yubordi. Olayinka darvozani ishg‘ol qildi.

"Inter" esa qo‘shib berilgan daqiqalarda hisobni tenglashtirdi. Sensi jarima zarbasidan darvoza to‘sinini nishonga oldi. Qaytgan to‘pni esa Barella darvozaga joylab qo‘ydi.

Shu tariqa, Konte shogirdlari dastlabki turda 2 ochko yo‘qotishgan bo‘lsa, "Slaviya" 1 ochko bilan ortga qaytdi.

"F" guruhi, 1-tur
Inter Italiya – Slaviya Chexiya 1:1 (0:0, 1:1)
Gollar: 0:1 – 63 Olayinka, 1:1 – 90 Barella.
Inter – Xandanovich, Shkrinyar, de Vrey, D`Ambrozio, Asamoa, Sensi, Brozovich (Barella, 71), Galyardini, Kandreva (Lazaro, 49), Martines (Politano, 72), Lukaku.
Slaviya – Kolarj, Kudela, Soufal, Govorka, Borjil, Masopust (Yusuf, 79), Souchek, Stanchu, Traore (Zeleni, 60), Gushbauer, Olayinka (Provod, 85).
Ogohlantirishlar: Govorka (40), Asamoa (54), Martines (66), Politano (83), Souchek (90).