Bugun O‘zbekiston Milliy olimpiya qo‘mitasida O‘zbekiston yilqichilik va ot sporti federasiyasining navbatdan tashqari hisobot-saylov konferensiyasi bo‘lib o‘tdi. Unda federasiya Bosh kotibini saylash kun tartibiga qo‘yilgan asosiy masalalar bo‘ldi.
Konferensiyani O‘zbekiston Milliy olimpiya qo‘mitasi prezidenti maslahatchisi Nazirjon Xudoyqulov olib bordi. Shuningdek, unda federasiya rahbariyati, Ijroqo‘m vakillari ham ishtirok etdi.
Yig‘ilishda shu paytgacha federasiya Bosh kotibi lavozimida ishlab kelgan Eldor Anorboyevning o‘z xohishiga ko‘ra lavozimidan bo‘shash to‘g‘risidagi arizasi qabul qilindi. Shundan so‘ng uning o‘rniga Nodirbek Ibragimov nomzodi ilgari surildi. Yig‘ilish ishtirokchilari ushbu nomzodni bir ovozdan ma’qullashdi va N.Ibragimov federasiya Bosh kotibi lavozimiga saylandi.
Konferensiya davomida federasiyaning kelajakda qilinishi kerak bo‘lgan ishlari borasida tegishli masalalar ko‘rib chiqildi. O‘zbekiston Milliy olimpiya qo‘mitasi federasiyaning yangi rahbariyati faoliyatida omad va zafarlar tilab, ushbu sportni rivojlantirish yo‘lida kuch-g‘ayrat yor bo‘lsin deb qoladi.
