Poytaxtimizda dzyudo bo‘yicha Gran-pri musobaqasi o‘z yakuniga yetib bormoqda. Musobaqaning so‘nggi kunida og‘ir vazn toifasidagi ishtirokchilar bahs olib borishdi.
Biroz avval +100 kilogramm vazn toifasining finalida terma jamoamiz vakili Bekmurod Oltiboyev jahon reytingi yetakchisi, jahon chempioni gruziyalik Guram Tushishvili bilan bahs olib bordi. Afsuski, murosasiz kechgan bellashuvda gruzin polvonining qo‘li baland keldi. Bu bilan Oltiboyev Tokio Olimpiadasi uchun 490 reyting ochkosini ham o‘z hisobiga qo‘shib qo‘ymoqda.
Yana bir ahamiyatli jihati shundaki, terma jamoamizning Toshkent Gran-prisida jamg‘argan medallari soni 2 ta oltin, 3 ta kumush va 2 ta bronzani tashkil etmoqda va bu Rossiya terma jamoasidan keyin umumjamoa hisobida ikkinchi o‘rinni egallashimizni ta’minladi.
Toshkent Gran-prisida quyidagi vakillarimiz shohsupaga ko‘tarilishdi:
Oltin medal:
-73 kg: Hikmatilloh To‘rayev
-81 kg: Sharofiddin Boltaboyev
Kumush medal:
-81 kg: Kamoliddin Rasulov
-70 kg: Gulnoza Matniyazova
+100 kg: Bekmurod Oltiboyev
Bronza medal:
-60 kg: Diyorbek O‘rozboyev
-66 kg: Sardor Nurillayev
