Nima ham derdik, Kuperning ish uslubi futbolimizga, aniqrog‘i ayrim futbolchilarimizga to‘g‘ri kelmadi. Endi o‘zimizning milliy qahramon bilan kurashni davom ettiramiz. Milliy qahramon esa vaqtida o‘zini har jabhada yaxshi ko‘rsatgan, har tomonlama sinovdan o‘tgan murabbiy.
Ammo ko‘ngilda bir andisha ham borki, shuni aytmasam bo‘lmas. Vadim Abramovning qaytishi oldingiday muvaffaqiyatli chiqarmikan?
Bu gaplarni Vadim Karlenovichning bilim va mahoratiga shubha qilganim uchun emas, balki vaziyat taqozosi tufayli aytmoqdaman. Yodingizda bo‘lsa, dastlabki tayinlovda Abramov terma jamoa postiga biz uchun kutilmagan vaziyatda, o‘zi uchun esa hamma narsa ayni pishib yetilgan vaqtda kelgan edi. Jamoa yosh murabbiy Mirjalol Qosimovning himoyaviy taktikasidan zerikkan, yangi rejalar, kreativ g‘oyalarga chanqoq holatda edi. Qolaversa, Abramov Iniliyev va Qosimov davrida ham jamoa bilan birga edi. Termamizning muammolarini, o‘zidan oldingi murabbiylarning xatolarini ham ichdan bilardi. Bundan tashqari, Vadim Karlenovichga jamoani rasmiy o‘yinlarga tayyorlash uchun yetarlicha vaqt ham bor edi. Arman mutaxassisi esa qator o‘rtoqlik uchrashuvlari turli tajribalar o‘tkazib, o‘z uslubini sayqallab borgandi. Shu sa’y-harakatlar bois Osiyo kubogida munosib ishtirok etgandik. Jahon chempionatining saralash o‘yinlarida ham bir-biridan ishonchli g‘alabalarni qo‘lga kiritgandik.
Hozir esa vaziyat butunlay o‘zgacha. Ya’ni, hamma ko‘zi to‘rt bo‘lib kutgan Abramov o‘zi uchun mutlaqo noqulay vaqtda boshqaruvga qaytmoqda. Mutaxassis 7 yil terma jamoadan uzoqda bo‘ldi. Uning qo‘l ostida javlon urgan futbolchilarning aksariyati bugun faoliyati yakunlagan yoki terma jamoa bilan xayrlashib ulgurgan. Kuper tuzgan tarkibdagi ayrim futbolchilar uning talabiga javob bermaydi. Aksiga olib, muhim rasmiy o‘yinga tayyorgarlik ko‘rish uchun fursat ham kam qolmoqda.
Umid qilamizki, Abramov o‘tgan davr mobaynida terma jamoa o‘yinlarini zimdan kuzatib borgan. Bosh murabbiylikka kelishini ham oldinroq bilgan va shunga mos rejalarni ishlab chiqishga ulgurgan. Aks holda, holimizga maymunlar qolib, jirafalar ham yig‘lab yuboradi. Axir navbatdagi raqib kimsan Saudiya Arabistonidan ochko tortib olgan jamoa. Ha, Yaman nomi bizga qo‘rqinchli eshitilmaydi. Ularni ham doim yutganmiiz. Ammo ushbu saralash bosqichi boshlanishidan oldin Falastin ham juda kamtarona ko‘ringan edi.
Shu bois O‘zbekiston futbol assosiasiyasi 10 okyatbrdagi o‘yyindan oldin bitta o‘rtoqlik uchrashuvini tashkillashtirib bersa ziyon qilmasdi. Agarda terma jamoalardan raqib topilmasa, hech bo‘lmaganda, superligamizning birorta klubi bilan o‘yin o‘tkazilsa ham foydadan xoli bo‘lmaydi. Zero, Abramov tarkibga yangi futbolchilarni chaqirishi shubhasiz. Ularning ayni paytda qanday holatda ekani esa noma’lum.
Ravshan Ermatov boshchiligidagi jamoadan yaxshi xabarlar kutib qolamiz.
