Hindistonning Bangalor shahrida suv sporti turlari bo‘yicha yosh toifadagi guruhlar o‘rtasida o‘ninchi Osiyo chempionatida ikkinchi kun ortda qoldi. Ushbu kun terma jamoamiz uchun kechagidan ham sermahsul o‘tgani e’tiborli.
Suzuvchimiz Vladislav Mustafin o‘zining sevimli brass usulida kecha 100 metr masofaga kechgan bahsda g‘alaba qozongan bo‘lsa, bugun u 50 metr masofada ham tengsiz ekanligini isbotladi. Shuningdek, yoshlarimizdan Aleksey Sidorchuk va Adilbek Yusupbayev 50 metrga erkin va brass usulda kechgan bahslarda mos ravishda kumush hamda bronza medallari bilan taqdirlandilar. Shuningdek, Xurshidjon Tursunov kattalar o‘rtasida 50 metrga erkin usulda suzish yo‘nalishida marraga ikkinchi bo‘lib yetib keldi.
Kunning birinchi yarmida 100 metrga aralash estafetada jamoamiz a’zolari shohsupaning uchinchi pog‘onasiga ko‘tarilgan bo‘lsalar, suv polosi bo‘yicha ayollar terma jamoamiz o‘zining asosiy raqibi Qozog‘iston termasini 16:11 hisobida dog‘da qoldirdi.
