O‘zbekiston kubogi yarim final bosqichidan o‘rin olgan AGMK hamda “Bunyodkor” uchrashuvidan so‘ng mezbonlar ustozi Mirjalol Qosimov quyidagi fikrlarni bildirib o‘tdi.

"Juda muhim o‘yinga kerakli darajada tayyorgarlik ko‘rgandik. "Bunyodkor"ni nimalarga qodirligini yaxshi bilardik va shunga yarasha ularni o‘rgangandik. Ularga qarshi ochiq futbol o‘ynab bo‘lmaydi. Shu boisdan ham uyushqoqlik bilan birdamlikda harakat qildik. Raqibga ochiq bo‘sh hududlar taqdim etmaslik kerakligini ta’kidlagandik va buni qaysidir ma’noda uddaladik. Futbolchilar berilgan ko‘rsatmalarni yaxshi bajarishdi.

Oxirigacha kurashishdi va muhim g‘alabani tantana qildik. Raqibni asosan qarshi hujumlarda ushlashga erishdik. Finalgacha bir qadam qolgandi va buni amallaganimizdan xursandmiz. Men bir narsani xohlayman: jamoam doim barqaror o‘yin ko‘rsatishi kerak. Sekin-asta shunga qarab boryapmiz ham.

Shu tempda davom etishimiz lozim. Futbol til bilan o‘ynalmaydi. Yutish uchun ko‘proq mehnat qilib, chin yurakdan futbol o‘ynash kerak. Nafaqat futbolda, balki istalgan ishni sidqidildan bajarish lozim", -deydi murabbiy.