Noyabrda 19 yoshgacha bo‘lgan futbolchilar o‘rtasida Osiyo Chempionati-2020 saralash bahslari o‘tkaziladi. O‘zbekiston yoshlar terma jamoasi ayni paytda Saudiya Arabistoni mezbonlik qiladigan saralash bahslariga tayyorgarlik jarayonini davom ettirmoqda.
Otabek G‘ulomxo‘jayev boshchiligidagi O‘zbekiston yoshlar terma jamoasi tayyorgarlik doirasida bir qator musobaqa va o‘rtoqlik o‘yinlarida maydonga tushmoqda. Oktyabr oyida O‘zbekiston U-19 terma jamoasi yana bir xalqaro musobaqada ishtirok etadi. Vakillarimiz Tailandda o‘tadigan “GSB Bangkok Cup” musobaqasiga taklif oldi. Mazkur musobaqada, shuningdek, Janubiy Koreya, Tailand va Vyetnam yoshlar terma jamoalari g‘oliblik uchun bahs olib borishadi.
Mazkur musobaqa oldidan terma jamoamiz bugundan yig‘in boshladi. Rejaga ko‘ra, O‘zbekiston U-19 terma jamoasi 7 oktyabrga qadar Toshkentda mashg‘ulotlar olib boradi. So‘ngra Tailandga yo‘l oladi.
