Superliga 22-turidan o‘rin olgan “Surxon” – “Navbahor” (0:0) jamoalari o‘rtasidagi uchrashuvdan so‘ng, “Navbahor” bosh murabbiyi Andrey Kanchelskis o‘yin haqidagi fikrlarini quyidagicha bildirdi.

- Uchrashuv juda qiyin kechdi. Boisi, Termizda o‘ynash oson emas. Hattoki, “Paxtakor” ham bu yerda durangga erishgan. Shunday bo‘lsa-da, biz Termizga ochko olish uchun emas, g‘alaba qozonish niyatida tashrif buyurgandik. Ammo bu futbol.

To‘g‘ri, uchrashuvning birinchi bo‘limida mezbonlar ko‘proq tashabbusga ega bo‘lishdi. Lekin durang natija menimcha, haqqoniy bo‘ldi.

“Surxon” kabi jamoamizni ham qo‘lga kiritilgan bir ochko unchalik qoniqtirmaydi. Boisi, ushbu turda “So‘g‘diyona” g‘alaba qozondi.

Biroq, mag‘lubiyatga uchragandan ko‘ra, durangni ham ijobiy natija desa bo‘ladi. Boisi, ta’kidlaganimdek, Termizda o‘ynash qiyin.

Maydon sifati yaxshi va futbolchilar bundan-da yaxshiroq to‘p surishlari mumkin edi. Ammo har ikki jamoa a’zolariga namoyish etgan o‘yinlari uchun minnatdorchilik bildiraman. Chunki hech kim jarohat olmadi hamda  jamoalar uchun barchasi ijobiy tarzda yakunlandi.

- Jahongir Mehmonov boshlang‘ich tarkibdan joy olmadi va so‘nggi daqiqalarda maydonga tushirildi. Buni nima bilan izohlaysiz?

- Bizda jamoa bor hamda boshlang‘ich tarkibni deyarli o‘zgartirmaymiz. G‘iyosjon Komilov bugun yaxshi o‘yin namoyish etdi. Jahongir Mehmonov esa hozircha zaxiradan maydonga tushyapti va bahslarga jiddiy tayyorgarlik ko‘ryapti. Hozircha bu haqda biror narsa deya olmayman. Mehmonov uchun keyinchalik barchasi ijobiy tarzda yakunlanishi hamda u boshlang‘ich tarkibda o‘ynashi ham ehtimoldan xoli emas.

“Navbahor” PFK matbuot xizmati.