Xabaringiz bor, poytaxtimizda yig‘in olib borayotgan O‘zbekiston U-19 terma jamoasi bugun Birlashgan Arab Amirliklari yoshlar terma jamoasi bilan bahs yuritdi. Mazkur o‘yindan so‘ng terma jamoamiz sardori Jasur Jaloliddinov bilan suhbatlashdik.

“Bugungi o‘yin saralashga ketishimizdan oldingi so‘nggisi edi. Bugun rejalashtirgan bazi bir narsalarni qilib ko‘rdik. O‘yin xohlaganimizdek bo‘lmadi. Raqibning o‘yinlarini ko‘rib chiqqan edik, ular biz kutgan o‘yinni namoyish qila olishmadi. Biz ulardan ko‘prog‘ini kutgan edik.

– Ikkinchi bo‘limda jamoamizning o‘yini o‘xshamadi va birorta aytarli hujum uyushtirmadi. Bunga nima to‘sqinlik qildi?

– Bugun katta hisobda yutishimiz mumkin edi. To‘g‘risini aytsam bugun ulardan kuchliroq o‘yin kutgan edik. Raqib bugun g‘alaba qozonishni xohlamadi va yotib olib, vaqtni cho‘zishga harakat qildi. Shu tariqa ular o‘yin tempini tushirishga harkat qilishdi. Shu sababdan ikkinchi bo‘limda o‘yinimiz o‘xshamadi.

– Bugungi o‘yinda “Qo‘qon-1912” futbolchisi Hojimat Erkinov va darvozabon Abduvohid Ne’matovning o‘rni qay darajada bilindi?

– Albatta, ularning o‘rni bilindi. Axir ular jamoamizning yetakchi futbolchilaridan. Ertadan ular ham qo‘shiladi va saralash bosqichga yaxshi kayfiyatda ketamiz.

– Nima sababdan “Bunyodkor”ning oxirgi o‘yinlaridan ko‘rinmayapsiz?

– Ochig‘i o‘zim ham tushunmayapman. Balki Abramov meni ayayotgandir yoki o‘yinimda pasayish bo‘lgandir...

– Keyingi mavsum ham “Bunyodkor”da qolasizmi?

– “Bunyodkor” bilan hali shartnomam bor nima bo‘lishini vaqt ko‘rsatadi.

Jaloliddin Qobiljonov suhbatlashdi.