Хабарингиз бор, пойтахтимизда йиғин олиб бораётган Ўзбекистон U-19 терма жамоаси бугун Бирлашган Араб Амирликлари ёшлар терма жамоаси билан баҳс юритди. Мазкур ўйиндан сўнг терма жамоамиз сардори Жасур Жалолиддинов билан суҳбатлашдик.
“Бугунги ўйин саралашга кетишимиздан олдинги сўнггиси эди. Бугун режалаштирган бази бир нарсаларни қилиб кўрдик. Ўйин хоҳлаганимиздек бўлмади. Рақибнинг ўйинларини кўриб чиққан эдик, улар биз кутган ўйинни намойиш қила олишмади. Биз улардан кўпроғини кутган эдик.
– Иккинчи бўлимда жамоамизнинг ўйини ўхшамади ва бирорта айтарли ҳужум уюштирмади. Бунга нима тўсқинлик қилди?
– Бугун катта ҳисобда ютишимиз мумкин эди. Тўғрисини айтсам бугун улардан кучлироқ ўйин кутган эдик. Рақиб бугун ғалаба қозонишни хоҳламади ва ётиб олиб, вақтни чўзишга ҳаракат қилди. Шу тариқа улар ўйин темпини туширишга ҳаркат қилишди. Шу сабабдан иккинчи бўлимда ўйинимиз ўхшамади.
– Бугунги ўйинда “Қўқон-1912” футболчиси Ҳожимат Эркинов ва дарвозабон Абдувоҳид Неъматовнинг ўрни қай даражада билинди?
– Албатта, уларнинг ўрни билинди. Ахир улар жамоамизнинг етакчи футболчиларидан. Эртадан улар ҳам қўшилади ва саралаш босқичга яхши кайфиятда кетамиз.
– Нима сабабдан “Бунёдкор”нинг охирги ўйинларидан кўринмаяпсиз?
– Очиғи ўзим ҳам тушунмаяпман. Балки Абрамов мени аяётгандир ёки ўйинимда пасайиш бўлгандир...
– Кейинги мавсум ҳам “Бунёдкор”да қоласизми?
– “Бунёдкор” билан ҳали шартномам бор нима бўлишини вақт кўрсатади.
Жалолиддин Қобилжонов суҳбатлашди.
