Professional boksning o‘ta yengil (-50,80 kg) vazn toifasida ringga chiqayotgan o‘zbekistonlik Olimjon Nazarov (20-5, 11 KO) 3 noyabr kuni navbatdagi reyting jangini o‘tkazdi. Bu haqda GoSport.uz internet-nashri muxbiri xabar bermoqda.
Shu kuni Nazarov Vyetnamning Hoshimin shahrida tashkillashtirilgan boks oqshomida tailandlik Chaivat Buadkratokka (32-2, 20 KO) qarshi ringga chiqdi. Shu vaqtga qadar faqat bir martagina mag‘lubiyat alamini totib ko‘rgan Buadkratok bu safar o‘zbekistonlik bokschiga imkoniyatni boy berdi. Jang to‘liq 8 raund davom etdi va ochkolar bo‘yicha Olimjon Nazarov g‘alabani qo‘lga kiritgan.
Ma’lumot uchun, Olimjon Nazarov o‘ta yengil vazn toifasining sharqiy mintaqa chempionlik kamari WBO Oriental chempionlik kamari sohibi sanaladi. U mazkur chempionligi evaziga WBO yo‘nalishi reytingida TOP-15talikka kirishga muvaffaq bo‘lgan.
P.S. Qoidaga muvofiq, rasmiy yo‘nalishlarning birinchi darajali mintaqaviy chempionlik kamarlari va uning himoya janglari kamida 10 raund, yoki 12 raunddan iborat bo‘lishi lozim. Olimjon Nazarov kecha bo‘lib o‘tgan jangda 8 raundlik reyting jangida ishtirok etdi. Ba’zi ommaviy axborot vositalarida bu holat noto‘g‘ri talqin qilingan va uning chempionlik kamari uchun ringga chiqqani ma’lum qilingan. Ammo bu professional boks qoidalari bo‘yicha noto‘g‘ri ma’lumot sanaladi.