Oldinroq O‘zbekiston va Qirg‘iziston terma jamoalari o‘rtasidagi o‘rtoqlik uchrashuvi Vadim Abramovning xohishi tufayli televideniyeda namoyish etilmasligi haqida xabar tarqalgandi.

Ammo Vadim Abramov o‘yinni TV orqali ko‘rsatish mumkinligi, bunga hech qanday qarshilik yo‘qligini ma’lum qildi: «Terma jamoa uchun muxlislar va ularning qo‘llab-quvvatlashi juda muhim. Saudiya Arabistoni bilan o‘yinda tribunalar to‘la bo‘lishiga ishonaman. Lekin Qirg‘iziston bilan uchrashuv o‘rtoqlik maqomiga ega bo‘lgani sababli bizda ko‘pchilik muxlislar stadionga kelmasligi mumkin degan taxmin bor edi.

Shu bois, ya’ni muxlislar bilan to‘lgan tribunalar qarshisida o‘ynash istagida biz TV orqali translyasiya qilinmagani ma’qul, deb o‘ylab qoldik. Bu shunchaki taklif edi, biz azbaroyi futbolimiz ixlosmandlari stadionga kelishlarini xohlaganimiz uchun shunday dedik. Qolaversa, shu orqali Saudiya Arabistoniga "syurprizlar" tayyorlash mumkin edi.

Mayli, agar Milliy teleradiokompaniya xohlasa, O‘zbekiston-Qirg‘iziston o‘yinini translyasiya qilishi mumkin, bizda hech qanday qarshilik yo‘q».