8-11 noyabr kunlari Peru poytaxti Lima shahrida og‘ir atletika bo‘yicha nufuzli Gran-pri musobaqasi bo‘lib o‘tadi. Dunyoning eng sara atletlari qatnashadigan mazkur musobaqada terma jamoamizning 3 nafar vakili Adhamjon Ergashev (-67 kg), Doston Yoqubov (-73 kg) va Muattar Nabiyeva (-55 kg) yurtimiz sharafini himoya qilishadi.

“Ushbu musobaqada jahonning eng sara yulduzlari ishtirok etishadi. Unda qatnashish uchun Xalqaro og‘ir atletika federasiyasi maxsus taklifnoma jo‘natgan bo‘lishi kerak. Bunday musobaqani o‘tkazishdan maqsad kelasi yilgi Olimpiya o‘yinlarida “A” guruhida ishtirok etishi kutiladigan sportchilarni to‘plab, ular orasida shiddatli raqobat yuzaga keltirishdir. Umid qilamizki, yurtimiz nomidan taklif etilgan 3 atletimiz o‘zlariga bildirilgan ishonchni oqlay olishadi”, – dedi O‘zbekiston og‘ir atletika federasiyasi raisining birinchi o‘rinbosari Shahrullo Mahmudov.

«Bu kabi musobaqada birinchi marta ishtirok etishim. Unda har bir vazn toifasining eng kuchli sportchilari qatnashadi. Qolaversa, turnir o‘tadigan mamlakat ham ancha olisda bo‘lgani uchun sal avvalroq borishimiz kerak. Federasiyamiz, xalqimiz bizga ishonch bildirib turishibdi. Nasib qilsa, bu ishonchni, albatta, oqlab qaytamiz«, – dedi Adhamjon Ergashev.

O‘zbekiston Milliy olimpiya qo‘mitasi murabbiy Bahram Mendiboyev va delegasiya rahbari Shahrullo Mahmudov boshchiligida Peru safariga yo‘l olgan vakillarimizga omad tilab qoladi.