O‘zbekiston terma jamoasi o‘rtoqlik uchrashuvida Qirg‘iziston terma jamoasini 3:1 hisobida taslim etdi. O‘yindan keyingi matubot anjumanining ikkinchi qismida mezbonlar ustozi Vadim Abramov qatnashdi.

“Yaxshi o‘yin bo‘ldi. Bugungi o‘yinda ko‘plab futbolchilarni sinovdan o‘tkazib oldik. Menimcha, uchrashuv anchagina foydali bo‘ldi. Endi bu g‘alabani unutib Saudiya Arabistoni termasiga qarshi tayyorgarlikni davom ettirishimiz kerak.  

Har bir jamoa raqib imkon berganicha o‘ynaydi. Tinmay hujum qilgan jamoa gol ham o‘tkazib yuboradi. “Siti” va “Liverpul”dan ham shu muammo. Axir bizda Van Deyk yo‘q-ku. Braziliyaliklar aytgandi, nechta gol ursangiz ham, biz xohlaganimizcha uramiz. To‘g‘ri biz braziliyalik emasmiz, biroq o‘rganamiz. Dunyoda ko‘p hujum qiladigan va umuman gol o‘tkazmaydigan jamoa bo‘lmasa kerak.

Odil Ahmedov Saudiyaga qarshi o‘yinda ham himoyada o‘ynaydimi? Bu haqida bir narsa deya olmayman. Bugun tajriba sifatida o‘ynatib ko‘rildi. Balki Saudiyaga qarshi o‘ynamasligi ham mumkin.

Murtozayevni nega tushirmadim? Avvaliga uni tushirmoqchi bo‘ldik. Keyinchalik o‘yin paytida navbatdagi bahsda ishonch bildiradigan futbolchilarga imkon berishga qaror qildim. Humoyun Saudiya va Falastinga qarshi o‘yinlar qaydnomasiga kiritilmaydi.. Sababi, bizda Shomurodov, Sergeev va Abduholiqvlar bor. To‘g‘risi uni sinab ko‘rmoqchi bo‘ldim, lekin bugungi o‘yinda 6ta o‘zgarish qilish mumkin edi.

Shuningdek, Olimpiya terma jamoasiga ham zarar qilmaslik uchun harakat qilayapmiz. Bu jamoa Dubayga xalqaro turnirga uchib ketmoqda. U jamoadagi futbolchilarga deyarli tegmadik. Olimpiada o‘yinlariga yo‘llanma olishsa, bu o‘zbek futbolchi uchun katta yutuq bo‘ladi”, -deya murabbiy so‘zlarini keltirmoqda Stadion.uz muxbiri Jaloliddin Qobiljonov.