Kuni kecha Qirg‘iziston Respublikasi delegasiyasi «Bunyodkor» futbol klubiga tashrif buyurdi.
Delegasiyaga Qirg‘iziston Respublikasi futbol federasiyasi vise-prezidenti Dostonbek Qo‘noqboyev rahbarlik qildi. Qirg‘iziston delegasiyasining «Bunyodkor»ga tashrifidan asosiy maqsad, akademiya faoliyatini o‘rganish, stadionni ko‘zdan kechirish va umumiy ma’noda klubning ichki strukturasi bilan tanishish edi. Boisi, yaqin yillarda Bishkekda ham «Bunyodkor»ga o‘xshash zamonaviy stadion va Milliy futbol akademiyasi qurilishi rejalashtirilgan. Shuning uchun «Bunyodkor»ga tashrif buyurgan delegasiya tarkibidan Bishkek shahri hokimi o‘rinbosari, arxitektura boshqarmasi rahbari kabi yuqori lavozimdagi shaxslar ham joy oldi.
Mehmonlar tashrifni «Bunyodkor» futbol akademiyasidan boshlashdi. Qirg‘iziston delegasiyasini akademiyada «Bunyodkor» futbol klubi Bosh direktori vazifasini bajaruvchi Ulug‘bek Mirzayev, akademiya direktori Vadim Shodimatov va jamoaning boshqa rasmiy shaxslari kutib oldi. Mehmonlar akademiyamizdagi o‘quv xonalari, qishgi mashg‘ulot hamda trenajyor zali, tibbiyot bo‘limi va oshxonasi bilan yaqindan tanishishdi. Akademiya xodimlari qirg‘izistonlik mehmonlarga har bir bo‘limning ish tartibi bo‘yicha to‘liq ma’lumot berdi. Xususan, mehmonlar tarbiyalanuvchilarimizning qaysi yo‘nalishlar bo‘yicha bilim olishidan tortib, qanday taomlar tanavvul qilish-yu, qachon mashg‘ulotlar o‘tkazishi hamda tibbiy holatining nazorati bo‘yicha ham o‘zlariga kerakli ma’lumotlarni olishdi.
Shundan so‘ng Qirg‘iziston delegasiyasi «Bunyodkor» stadioniga tashrif buyurdi. Bu yerda mehmonlarni stadion direktori Vohid Zokirov va boshqa xodimlar kutib oldi. Mehmonlar stadionning yechinish xonalari, martabali insonlar uchun ajratilgan xonalar, restoran, muzey va albatta maydonning o‘zini ko‘zdan kechirishdi. Tabiiyki, stadion, undagi sharoitlar, muxlislar uchun yaratilgan qulayliklar bo‘yicha to‘liq ma’lumotlar berildi.
Qirg‘iziston delegasiyasi tarkibi
1. Qo‘noqboyev Dostonbek Tursunaliyevich – Qirg‘iziston futbol federasiyasi vise-prezidenti
2. Abirov Jonibek Bolotbekovich - Bishkek shahri kengashi spikeri
2. Jakishov Ruslan Sherg‘oziyevich - Bishkek shahri kengashi vise-spikeri
3. Qodiraliyev Asilbek Melsovich - Ota-YUrt Respublika fraksiyasi yetakchisi
4. Amatov Risboy Amatovich - Onuguu-Progress fraksiyasi yetakchisi
5. Dokenov Ernis Sharapidinovich - Bishkek shahri kengashi deputati
6. Baketayev Almaz Kushbekovich - Bishkek shahri birinchi vise-meri
7. Alimkulov Aziz Esenbekovich - Bishkek shahri vise-meri
8. Usubaliyev Bolot Abdildabekovich – Bishkek bosh arxitektura boshqarmasi boshlig‘i o‘rinbosari
10. Rustam Janibayev – Qirg‘iziston futbol assosiasiyasi raisi
