APL qasos olishga o‘rgangan: Ikki yil oldin ham, uch yil oldin ham dekabrning mana shunday kunlarida bir qator superklublar chempionlikni orzu qilmay qo‘yishgandi. Sabab oddiy – birinchi o‘rin egasi haddan tashqari yuqorilab ketgani...

Alamki, bu mavsum shu qismatga “Man. Siti” mahkum etildi. Gvardiola o‘z intervyusida: “Liverpul”ni o‘ylamay ham qo‘ydim”, dedi. Shu kunlarniyam ko‘ryapmiz.

Ammo tur o‘yini bo‘lmish "Emereyts"dagi uchrashuv boshqa jihatlari bilan-da muhim. Mikel Arteta! Ha, bir paytlari “Arsenal”da porlagan yigit bugungi kunda Pep bilan yonma-yon ish olib bormoqda. Ajoyib mutaxassisga aylandi.

Uch yil oldin ispaniyalik murabbiy Angliyaga kelib hali “Arsenal”ni o‘rganmagan paytlari “kanonirlar” bilan bahsdan oldin jamoani butkul Artetaga topshirgandi: “Nima qilmoqchi bo‘lsang qilaver. Sen mendan ko‘ra “Arsenal”ni yaxshiroq bilasan...”

Arteta juda ko‘p chizmalarga o‘zgartirish kiritib, sobiq klubini 2:1 hisobida dog‘da qoldirgandi.

Bugun "Siti" taqdiri, albatta, Artetaga topshirilmaydi. Balki London tomondagilar uni "to‘pchilar"ga ustoz qilib olib kelishmoqchi. Arteta alohida ish yuritadigan payti kelganini-da aytib o‘tganini hisobga olsak, eng yaxshi variant – “Arsenal”...

“Liverpul”ni o‘ylamay qo‘ygan Gvardiola har holda “Lester”ni o‘ylashi kerak. “Tulkilar” kuni kecha durang qayd etib, “shaharliklar”ni o‘zlariga yaqinlashtirib qo‘yishlari mumkin.

“Arsenal” esa, Lyunberg boshchiligida ilk g‘alabani qo‘lga kiritib, o‘zlarini yomon his etishmayaptiyu, Arteta kelishini istayotgan futbolchilar “Man. Siti”ga munosib qarshilik ko‘rsatisharmikan?

Xullas, hammasi chuvalashib ketgan voqealar ostida o‘tadigan o‘yinni biz bilan (sherigim – Hasan Turdialiyev) tomosha qilishingiz mumkin. Zerikmasligingiz kafolatlangan.

Xayrulla Hamidov.

P.S. "Arsenal" - "Manchester Siti" o‘yini Toshkent vaqti bilan 21:30da start oladi.