Shu kunlarda Chexiyada xokkey bo‘yicha yoshlar (U20) o‘rtasida jahon chempionati bo‘lib o‘tmoqda. Kecha AQSH terma jamoasi guruh bosqichi doirasida Rossiyaga qarshi muzga chiqib, 3:1 hisobida g‘alaba qozondi.
Amerikaliklar safida Artur Kaliyev 2ta gol urishga muvaffaq bo‘ldi. Aslida ushbu xokkeychi 2001 yilda Toshkentda tug‘ilgan bo‘lib, Artur 7 oylik paytida oilasi bilan Qo‘shma Shtatlarga ko‘chib ketgan.
Kaliyev 7 yoshidan boshlab konkidan uchishni o‘rganishni boshlagan. Unda xokkeyga nisbatan qobiliyati borligini bilgan ota-onasi Michigan shtatiga ko‘chib borb, Arturni xokkey klubiga berishgan. U 16 yoshida Kanadaning «Gamilton» xokkey klubida o‘ynay boshlagan. 18 yoshida esa AQSH yoshlar terma jamoasiga taklif etilgan. Hamyurtimiz 2018/2019 yilgi mavsumda 67ta o‘yinda maydonga tushib, 51ta gol urishga muvaffaq bo‘lgani e’tiborga molik.
Artur JCHning 1-turida Kanada darvozasiga ham bitta gol urgan edi. Shu tariqa, uning musobaqadagi gollari soni 3taga yetdi.
Kaliyev hozirda "Los Angeles Kings" jamoasi a’zosi hisoblanadi.
