Шу кунларда Чехияда хоккей бўйича ёшлар (U20) ўртасида жаҳон чемпионати бўлиб ўтмоқда. Кеча АҚШ терма жамоаси гуруҳ босқичи доирасида Россияга қарши музга чиқиб, 3:1 ҳисобида ғалаба қозонди.
Америкаликлар сафида Артур Калиев 2та гол уришга муваффақ бўлди. Аслида ушбу хоккейчи 2001 йилда Тошкентда туғилган бўлиб, Артур 7 ойлик пайтида оиласи билан Қўшма Штатларга кўчиб кетган.
Калиев 7 ёшидан бошлаб конькидан учишни ўрганишни бошлаган. Унда хоккейга нисбатан қобилияти борлигини билган ота-онаси Мичиган штатига кўчиб борб, Артурни хоккей клубига беришган. У 16 ёшида Канаданинг «Гамильтон» хоккей клубида ўйнай бошлаган. 18 ёшида эса АҚШ ёшлар терма жамоасига таклиф этилган. Ҳамюртимиз 2018/2019 йилги мавсумда 67та ўйинда майдонга тушиб, 51та гол уришга муваффақ бўлгани эътиборга молик.
Артур ЖЧнинг 1-турида Канада дарвозасига ҳам битта гол урган эди. Шу тариқа, унинг мусобақадаги голлари сони 3тага етди.
Калиев ҳозирда "Los Angeles Kings" жамоаси аъзоси ҳисобланади.
