Do‘rmondagi qarorgohda yig‘ilgan AGMK Qibraydagi o‘yingohda har kunlik mashg‘ulotlarni olib bormoqda. Ayni damda murabbiylar shtabi futbolchilarning jismoniy holatini tetiklash ustida katta hajmdagi ishlarni amalga oshirishmoqda. Bir kunlik ta’tildan qaytgan futbolchilar tibbiy ko‘rikdan o‘tgach, bugundan yana mashg‘ulotlarni tiklashdi.

Ertadan esa jamoa qishki yig‘indagi dastur odatiga ko‘ra, kuniga ikki mahaldan mashg‘ulotlar o‘tkazadi. Mashg‘ulotlarning bir qismi maydonda, to‘p bilan ishlash bo‘yicha o‘tkazilsa, ikkinchi qismida futbolchilar zalda mushaklarni chiniqtirish borasida shug‘ullanishadi.

Bugundan e’tiboran mashg‘ulotlarga kecha transfer qilingan va AGMKga bir yillik tanaffusdan so‘ng qaytgan serbiyalik yarim himoyachi Yovan Jokich qo‘shildi. Shuningdek, o‘tgan mavsumning ikkinchi qismidan e’tiboran olmaliqlar a’zosiga aylangan legionerlar — Igor Zonich va Elguja Grigalashvili ham jamoa lageriga qaytdi va bugundan mashg‘ulotlarga qo‘shildi.