Xabaringiz bor , “Nasaf“ futbol klubining kelajagiga befarq bo‘lmagan bir guruh faol muxlislar Qashqadaryo viloyati hokimi Zoyir Mirzayev qabulida bo‘lishgandi. Bo‘lib o‘tgan suhbatga aniqlik kiritish maqsadida viloyat hokimligi Axborot xizmati rahbari A.Sodiqovga murojaat qildik.

- Viloyat hokimi klub muxlislari bilan uchrashganlaridan so‘ng “Nasaf“ futbol klubi prezidenti — “Sho‘rtan gaz kimyo“ majmuasi direktori Shuhrat Aslanov hamda jamoa bosh murabbiyi Ro‘ziqul Berdiyev bilan uchrashdi, — deydi A.Sodiqov.

Uchrashuvda klub rahbariyati jamoaning hozirgi holati, klubning respublikada tutgan o‘rni, undagi kamchiliklar va qilinishi kerak bo‘lgan ishlar haqida viloyat hokimiga ma’lumot berdi.

Viloyat hokimi ham muxlislarning talabiga binoan viloyatning bosh jamoasiga 3-4 nafar atrofida tajribali o‘yinchilarni klubga jalb etish bo‘yicha mablag‘ masalasida yordam berishini ta’kidlab o‘tdi. Bundan tashqari klubni yana-da rivojlantirish to‘g‘risida o‘z takliflari bilan ham o‘rtoqlashdi.