O‘zbekiston va BAA o‘rtasida 23 yoshgacha bo‘lgan futbolchilar o‘rtasidagi nimchorak final uchrashuvi o‘z yakuniga yetdi. Vatandoshlarimizning g‘alabasi bilan yakunlangan o‘yindan so‘ng, olimpiyachilarimiz yetakchisi Sanjar Qodirqulov bilan kichik intervyu uyushtirdik.

Sanjar tezkor gol bizga qanday ta’sir qildi deb hisoblaysiz?

“Nima bo‘lsa yaxshilikka” deganlaridek bugungi uchrashuvda tezkor gol o‘tkazib yuborganimiz qo‘l keldi. Sababi, bizda vaziyatdan chiqib ketish uchun vaqt yetarlicha edi. Goldan so‘ng, yigitlar bor e’tiborini o‘yingga qaratishni boshlashdi. Hisobni tenglashtirgach, o‘zimizga bo‘lgan ishonch yanada ortib ketdi. Menimcha, tezkor gol bizning yirik hisobda g‘alaba qozonishimiz uchun turtki bo‘ldi.

Bugungi o‘yinda yigitlar uyushqoq harakat qilishdi. Drulovich o‘yindan oldin qanday ko‘rsatmalar berdi?

Birinchi navbatda, raqibni to‘liq o‘rganib chiqdik. Ularning qaysi futbolchisidan havf kutishdan tortib, jarimalarni qanday ijro etilishiga qadar. Ulardan kelib chiqib o‘yinga taktik sxema tanlandi. O‘ylashimcha, murabbiylarning to‘g‘ri ko‘rsatmasi evaziga bugun o‘yinimiz chiroyliroq chiqdi.

Saudiyaga qarshi ham 90 daqiqa yuqori tempda to‘p surishning iloji bormi?

Bizda tiklanish uchun 3 kun vaqt mavjud. Nasib qilsa, shu kunlar davomida yo‘qotilgan energiyaning o‘rnini to‘ldirishga ulguramiz. Saudiya Arabistoniga qarshi o‘yinda qanday tempda to‘p surishimizni esa, murabbiylar shtabi hal etadi. Bizning vazifamiz ularning ko‘rsatmalarini ortig‘i bilan bajarishdan iborat.