Yana sakkiz turdan so‘ng, aniqrog‘i 4 aprel kuni "Etihad" o‘yingohida "Manchester Siti" "Liverpul"ni qabul qiladi. Agar sakkiz turlik o‘yinlarni ikki jamoa bir xil natija bilan olib borishsa, 32-tur doirasidan o‘rin olgan bahs Klopp jamoasining chempionligini hal qilishi mumkin. Oltita o‘yinda maksimum 18 ochko jamg‘arish mumkin, jamoalar o‘rtasidagi farq esa, 19 ochko bo‘ladi, tushundingiz, a?!

Endi mana bunaqa gap. Ikki yil oldin Pep Gvardiola ham shu stadionda chempionlikni nishonlamoqchi bo‘lgandi. Maur va Pogba rozilik bermagan. Bu safar shu taqdir "ManSiti" yigitlarining boshiga tushishi mumkin.

Yanada qiziq tomoni, "Liverpul" ayni paytda Angliya chempionatida mag‘lubiyatsiz seriyasini 41 o‘yinga yetkazgan. "Arsenal"ning rekordini yangilash uchun roppa-rosa sakkiz o‘yinda yutqazmasligi kerak. "Etihad"dagi bahsgacha liverpulliklar mag‘lubiyatga uchrashmasa, aniqki, o‘sha kuni bir ochko uchun ham o‘ynayverishadi — bu ularni ham chempionga aylantiradi, ham rekordni yangilashga yordam beradi.

"Liverpul" o‘ttiz yil deganda orziqib kutilgan chempionligiga mana shuncha qo‘shaloq yutuqlar bilan borishi mumkin. Mabodo Gvardiola g‘alabaga erishsa, Kloppga atalgan tortning gullik qismini tishlab olgan bo‘ladi go‘yo.

Xullas, 32-turgacha "Liverpul" hamda "Siti" jamoasiga qarshi maydonga tushadigan klublardan iltimos, shundoq ajoyib xotimadan bizlarni mahrum qilmasdan, uch ochkodan ulashaveringlar!) Zotan bunaqa ko‘p intrigalar aralash mavsum yana o‘ttiz yilda keladimi, yo‘qmi, bilmaymiz...

Xayrulla HAMIDOV.