Kataloniyaning «Barselona» klubi «Atletiko Madrid» hujumchisi Xulian Alvaresni o‘z safiga qo‘shib olish ustida ish boshlashdi. Jamoa bosh murabbiyi Xans-Diter Flik rahbariyatdan yozgi transfer oynasida markaziy hujumchi pozisiyasini kuchaytirishni so‘ragan va argentinalik futbolchi ushbu rol uchun asosiy nomzod sifatida ko‘rilmoqda.

ESPN nashrining xabar berishicha, «ko‘k-anorranglilar» madridliklar bilan bog‘lanib, ehtimoliy transfer borasidagi pozisiyasini o‘rganishgan. «Barselona» ushbu kelishuvni amalga oshirish moliyaviy jihatdan juda murakkab ekanini tushunib turibdi. Biroq klub vakillari avvalroq Antuan Grizmann bilan sodir bo‘lganidek, futbolchining jamoasini o‘zgartirish istagi transferda muhim rol o‘ynashiga umid qilishmoqda.

Hozirda Alvaresning shartnomasida tovon puli 500 million yevro qilib belgilangan. O‘z navbatida, «Atletiko» hujumchini qo‘ldan chiqarmaslik uchun unga 2032 yilgacha mo‘ljallangan yaxshilangan shartnoma taklif qilishga tayyorlanmoqda.

Ma’lumot uchun, Xulian Alvares La Liganing joriy mavsumida 29 ta o‘yinda maydonga tushib, 8 ta gol va 4 ta golli uzatmaga mualliflik qildi.