Каталониянинг «Барселона» клуби «Атлетико Мадрид» ҳужумчиси Хулиан Альваресни ўз сафига қўшиб олиш устида иш бошлашди. Жамоа бош мураббийи Ханс-Дитер Флик раҳбариятдан ёзги трансфер ойнасида марказий ҳужумчи позициясини кучайтиришни сўраган ва аргентиналик футболчи ушбу рол учун асосий номзод сифатида кўрилмоқда.

ESPN нашрининг хабар беришича, «кўк-анорранглилар» мадридликлар билан боғланиб, эҳтимолий трансфер борасидаги позициясини ўрганишган. «Барселона» ушбу келишувни амалга ошириш молиявий жиҳатдан жуда мураккаб эканини тушуниб турибди. Бироқ клуб вакиллари аввалроқ Антуан Гризманн билан содир бўлганидек, футболчининг жамоасини ўзгартириш истаги трансферда муҳим рол ўйнашига умид қилишмоқда.

Ҳозирда Альвареснинг шартномасида товон пули 500 миллион евро қилиб белгиланган. Ўз навбатида, «Атлетико» ҳужумчини қўлдан чиқармаслик учун унга 2032 йилгача мўлжалланган яхшиланган шартнома таклиф қилишга тайёрланмоқда.

Маълумот учун, Хулиан Альварес Ла Лиганинг жорий мавсумида 29 та ўйинда майдонга тушиб, 8 та гол ва 4 та голли узатмага муаллифлик қилди.