O‘tgan yilning kuzida Osiyo futbol konfederasiyasining bolalar-o‘smirlar futbolini rivojlantirish masalalari bo‘yicha mas’ul xodimi Laslo Salai boshchiligidagi maxsus ishchi guruh yurtimizda bo‘lib, “Bunyodkor” hamda Andijon viloyati hududiy futbol akademiyasining ish-faoliyati, infratuzilmasi hamda yosh futbolchilarni tarbiyalash dasturi bilan tanishgan edi. Bundan ko‘zlangan asosiy maqsad – mazkur akademiyalarning OFK elit o‘smirlar tuzilmalari safiga qo‘shishga mos kelishini aniqlash va shu asosda akademiyalarga “uch yulduzli” tizim bo‘yicha maqom taqdim etish edi.

O‘rganishlar xulosasi o‘laroq OFK O‘zbekiston futbol assosiasiyasiga “Bunyodkor” hamda Andijon viloyati hududiy futbol akademiyalarining Osiyo futbol konfederasiyasi elit o‘smirlar tuzilmasining to‘laqonli a’zolari maqomini olgani bo‘yicha maktub yo‘lladi. Xususan, “Bunyodkor” futbol akademiyasi “ikki yulduzli” akademiya maqomiga ega bo‘ldi. Andijon viloyati hududiy futbol akademiyasi esa “bir yulduzli” maqomiga ega bo‘ldi.

Qayd etish joiz, bunday maqomga ega bo‘lgan akademiyalar qit’a futbol uyushmasi o‘tkazadigan turli musobaqa hamda sport tadbirlarida ishtirok etish imkoniyatiga ham ega bo‘ladi.

Ta’kidlash lozim, “Bunyodkor” akademiyasi “ikki yulduz”ga ega bo‘lgan O‘rta Osiyodagi yagona futbol akademiyasiga aylandi. “Uch yulduzli” akademiya maqomi qit’amizda Qatardagi “Aspire” akademiyasidagina mavjud.