«PSJ» hujumchisi Neymar jamoaning intizomini buzdi.

28 yoshli futbolchi 12 fevral kuni bo‘lib o‘tgan Fransiya kubogining chorak final bosqichi doirasida «Dijon»ga qarshi o‘yinda (6:1) maydonga tushmadi. Ertasi kuni esa u klub bazasiga tashrif buyurib, o‘yinda ishtirok etmagan boshqa futbolchilar bilan birga jamoaning mashg‘ulotida ishtirok etishi kerak edi.

Ammo Neymar mashg‘ulotda ishtirok etishdan bosh tortdi va murabbiy Tomas Tuxelga "dam olishi kerakligini" ta’kidladi. Futbolchining o‘zini bunday tutishiga Tuxel tomonidan «Dijon»ga qarshi o‘yindan keyin aytilgan fikr sabab bo‘lgan bo‘lishi mumkin. Germaniyalik mutaxassis braziliyalik futbolchining «Borussiya»ga qarshi kechadigan Yevropa chempionlar ligasi bahsida maydonga tushishiga ishonchi komil emasligini ta’kidlagan edi.

Neymar o‘yinga tayyor bo‘lgani uchun klub va murabbiyning xatti-harakatidan norozi bo‘lgan. Hujumchi Dortmunddagi uchrashuvdan keyin klubni tanqid qilib chiqdi:

«Ketma-ket 4ta o‘yinda maydonga tushmaslik oson emas edi. Lekin bu mening qarorim emasdi. Bu klub va shifokorlar qarori edi. Biz ko‘p gapirdik va bu menga yoqmadi. Men o‘ynashni istagandim, o‘zimni yaxshi his qilayotgandim, ammo klub cho‘chidi. Bu esa menga salbiy ta’sir ko‘rsatdi», — dedi Neymar.