«ПСЖ» ҳужумчиси Неймар жамоанинг интизомини бузди.

28 ёшли футболчи 12 февраль куни бўлиб ўтган Франция кубогининг чорак финал босқичи доирасида «Дижон»га қарши ўйинда (6:1) майдонга тушмади. Эртаси куни эса у клуб базасига ташриф буюриб, ўйинда иштирок этмаган бошқа футболчилар билан бирга жамоанинг машғулотида иштирок этиши керак эди.

Аммо Неймар машғулотда иштирок этишдан бош тортди ва мураббий Томас Тухелга "дам олиши кераклигини" таъкидлади. Футболчининг ўзини бундай тутишига Тухель томонидан «Дижон»га қарши ўйиндан кейин айтилган фикр сабаб бўлган бўлиши мумкин. Германиялик мутахассис бразилиялик футболчининг «Боруссия»га қарши кечадиган Европа чемпионлар лигаси баҳсида майдонга тушишига ишончи комил эмаслигини таъкидлаган эди.

Неймар ўйинга тайёр бўлгани учун клуб ва мураббийнинг хатти-ҳаракатидан норози бўлган. Ҳужумчи Дортмунддаги учрашувдан кейин клубни танқид қилиб чиқди:

«Кетма-кет 4та ўйинда майдонга тушмаслик осон эмас эди. Лекин бу менинг қарорим эмасди. Бу клуб ва шифокорлар қарори эди. Биз кўп гапирдик ва бу менга ёқмади. Мен ўйнашни истагандим, ўзимни яхши ҳис қилаётгандим, аммо клуб чўчиди. Бу эса менга салбий таъсир кўрсатди», — деди Неймар.