Hozirgina o‘z yakuniga yetgan “Lokomotiv” va “Andijon” o‘rtasidagi uchrashuvdan so‘ng, “Loko” hujumchisi Timurxo‘ja Abduholiqov bilan kichik suhbat uyushtirdik

-Timurxo‘ja bugun “Loko” ko‘rsatgan futbol hech kimda yaxshi taassurot qoldirmadi. Buning sababi nima bilan bog‘liq?

- Avvalo mavsumning ilk o‘yini ekanligini unutmaslik lozim. Bugun iloji boricha ehtiyotkorona futbol o‘ynashga harakat qildik. Shu sababli zerikarliroq futbol namoyish etgan bo‘lsak kerak.

- Bugun asosan qanotlarda harakat qildingiz?

- Ochig‘i bu murabbiylar ko‘rsatmasi. Vaziyat shuni talab etgani uchun chap va o‘ng qanot yarim himoyasida harakat qildim. O‘yinning so‘nggi daqiqalarida yana markazga qaytdim. Murabbiylar aytgan nuqtada harakat qilishimiz lozim.

- Bu mavsumda “Loko”ning tarkibi har doimgidanda kuchsizroqdek tuyulmayaptimi?

- Buni vaqt ko‘rsatadi. Ayni damda bizni hech kim chempionlik uchun kurash olib boradiganlar qatoriga qo‘shmayapti. Bir tomondan bu ham yaxshi. Hozircha biz bilan hisoblashishni istamaganlarga mavsum so‘ngida ko‘rsatib qo‘yamiz. Yigitlardan ko‘nglim to‘q. Asosiysi nomlar emas, jamoaviy o‘yin.

- Siz va Samvel Babayan o‘rtasidagi mojoroga “Loko”da ham davom etganidan xabarimiz bor. Nega jamoaga Babayan kelgach, boshqa klubga o‘tdingiz. U ketgach yana jamoaga qaytingiz. Samvel Babayan bilan aloqalaringiz hali ham yomonmi?

- Futbolga tushunadigan odamlarning barchasi Babayan bilan aloqalarimiz qanday ekanligini yaxshi biladi. Men, Babayan klubga kelgani uchun jamoadan ketmadim. Shunchaki taklif bo‘ldi va u meni to‘liq qanoatlantirgani uchun rozi bo‘ldim.

- Demak “Loko”dan ketishingizga Babayanning aloqasi yo‘q?

- Yuqorida aytganimdek futbolni tushunadigan barcha bu savolning javobini biladi.