Oliy xokkey ligasining pley-off bosqichida ishtirok etayotgan O‘zbekistonning "Humo" klubi bugun o‘ta qiyin bahsni o‘tkazdi.

Toshkentliklar bugun Rossiyaning "Toros" klubiga qarshi seriyadagi 6-o‘yinni o‘tkazishdi. Neftekamskliklarga qarshi bugungi bahsda "Humo"ga g‘alaba juda zarur edi. Aks holda chorak finalga raqib jamoa yo‘l olar edi.

Birinchi bo‘limga tugashiga 3 daqiqa qolganida Yasenko Ivan jamoamizni oldinga olib chiqdi. O‘yin davomida ustunlik o‘zbekistonliklar tomonida bo‘ldi. Ayniqsa, uchinchi davrda "Toros"ning biryo‘la ikki xokkeychisi maydondan chetlatilgan paytdagi ustunlikdan "Humo" a’zolari foydalanishdi. Aksincha, uchrashuvning asosiy vaqti tugashiga 4 daqiqadan kamroq vaqt qolganida rossiyaliklar hisobni tenglashtirishdi.

20 daqiqalik overtaymning birinchisida hisob o‘zgarmadi. Ikkinchi overtaymda esa "Humo" g‘alabani ilib ketish uchun ajoyib imkoniyatga ega bo‘ldi. Raqib tomonidan ishlatilgan qoidabuzarlik tufayli "Toros" darvozasiga bullit belgilandi. Ammo Artyom Voronin ushbu imkoniyatdan foydalana olmadi.

Shunga qaramay, oradan ko‘p o‘tmasdan xokkeychilarimiz Maksim Kazakovni darvozabon bilan yakkama-yakka vaziyatga chiqarib yuborishdi va darvozani ishg‘ol qildi.

Shu tariqa, "Toros" va "Humo" jamoalari o‘rtasidagi seriyada hisob tenglashdi — 3:3. Hal qiluvchi bahs 7 mart kuni Neftekamsk shahrida bo‘lib o‘tadi.

Oliy xokkey ligasi, pley-off
"Humo" - "Toros" - 2:1 (OT)