Bugun Namangan shahrida joylashgan Viloyat futbol mahorati maktabi tasarrufidagi “Yosh kuch” stadionida O‘zbekiston futbol assosiasiyasi hamda Osiyo futbol konfederasiyasi tomonidan hamkorlikda barpo etilgan yangi sun’iy qoplamali maydonning ochilish marosimi o‘tkazildi.

Katta tantana tarzida tashkil etilgan ochilish marosimida Namangan viloyati hokimi Xayrullo Bozarov, Jismoniy tarbiya va sport vazirning birinchi o‘rinbosari, O‘FA Birinchi vise-prezidenti Ravshan Ermatov, O‘zbekiston milliy terma jamoasi bosh murabbiyi Vadim Abramov, terma jamoamiz sardori Odil Ahmedov hamda futbol jamoatchiligi vakillari ishtirok etishdi.

Ochilish marosimida dastlab Namangan viloyati hokimi Xayrullo Bozarov so‘zga chiqib, O‘FA tomonidan yurtimizda futbol ommaviyligini oshirish, hududlarda mavjud infratuzilmani yaxshilash borasida olib borilayotgan ishlarga katta baho berdi. O‘z navbatida Ravshan Ermatov ham Namangan xalqi azaldan futbolni yaxshi ko‘rishini alohida qayd etdi:

– Namanganda futbolga hamisha katta e’tibor qaratib kelinadi. Namangan ahli futbolga o‘zgacha mehr qo‘yganini nafaqat yurtimizda, balki undan tashqarida ham juda yaxshi bilishadi. Bejizga buyerdan ko‘plab mashxur futbolchilar yetishib chiqmagan. Ayni paytda yurtimiz oktyabr oyida mezbonlik qiladigan 19 yoshgacha bo‘lgan futbolchilar o‘rtasidagi Osiyo chempionatining guruh bahslarini Namanganda ham o‘tkazishni rejalashtiryapmiz. Shu kabi jihatlarni inobatga olgan holda OFK bilan hamkorlikda namanganlik yosh futbolchilar uchun sun’iy qoplamali maydon barpo etildi. Ishonchim komil, yaqin kelajakda buyerda shug‘ullanadigan yosh iste’dod egalari katta futbolchilar bo‘lib yetishadi va milliy terma jamoamizning muvaffaqiyatlariga xissa qo‘shishadi, – dedi Ravshan Ermatov.

Shundan so‘ng yangi qurib bitkazilgan maydonda ilk uchrashuv o‘tkazildi. Xayrullo Bozarov hamda Ravshan Ermatov boshlab bergan uchrashuvda yaqin o‘tmishning mashxur futbolchilaridan iborat jamoa Namangan viloyati futbol mahorati maktabining 2002 yilda tavallud topgan futbolchilariga qarshi bahs yuritdi. Yosh o‘yinchilar Odil Ahmedov, Shuhrat Mirxoldirshayev, Sanjar Asqaraliyev, Ilhom Boydedayev, Nosir Otaqo‘ziyev kabi mahorat egalariga qarshi to‘p surib, ulardan maydonda zarur ko‘nikmalar olish imkoniga ega bo‘lishdi.