"Paxtakor" bosh murabbiyi "Buxoro" bilan uchrashuvdan keyin matbuot anjumanida ishtirok etdi.

"Mavsum starti bo‘lgani sababli har bir o‘yin juda qiyin o‘tmoqda. Tezroq yaxshi holatga kirib olishimiz kerak. Uchta goldan tashqari yana 4-5 golli vaziyat bo‘lgandi. Raqibda esa adashmasam birinchi bo‘limda yarim keskinlikdagi vaziyat bo‘ldi.

G‘alaba qozonish juda muhim edi. Birinchi bo‘limda sekinroq o‘ynadik. Balki raqib maydon markazida to‘pni erkin berib qo‘ygani uchun shunday bo‘lgandir. Tanaffusdan so‘ng ko‘proq hujumga o‘tdik, to‘p uzatishlar ko‘proq bo‘ldi. Bir marta to‘p ustunga tegdi. Chiroyli o‘yin va chiroyli gollar evaziga juda muhim g‘alaba qo‘lga kiritildi.

Superligada ikkala o‘yinda ham raqib deyarli 10 kishi bo‘lib himoyalandi. Men ko‘prog‘ini xohlayman va ko‘prog‘ini kutaman. Sur’atni o‘stirish kerak. Hujumda juda keskin emasdirmiz, biroq 4ta rasmiy o‘yinda 10ta gol urdik va 2ta gol o‘tkazdik. O‘yinni yaxshilash uchun vaqt bor, xatolarni ko‘rib chiqish va ishlashda davom etish lozim", — dedi Arveladze.