Ayni kunlarda UEFA delegasiyasi yurtimizda bo‘lib turganidan xabaringiz bor.
UEFA Assist tashabbusi doirasida tashkilotning xalqaro aloqalar boshqarmasi rahbari Yeva Paske boshchiligidagi UEFA delegasiyasi shu kunlarda O‘FAning ish-faoliyati bilan yaqindan tanishmoqda.
Tashrif doirasida O‘FA rahbar hamda xodimlari bilan, PFL va Coca Cola Superliga klublari vakillari bilan uchrashuvlar tashkil etilmoqda, O‘FA hamda PFLning har bir yo‘nalish bo‘yicha olib borayotgan faoliyati UEFA mutaxassislari tomonidan atroflicha o‘rganilmoqda.
13 mart kuni mazkur tashrif yakunlariga bag‘ishlangan matbuot anjumani tashkil etiladi. UEFA vakillari bilan bo‘ladigan anjuman soat 15:45da “Hilton” mehmonxonasida bo‘lib o‘tadi. Matbuot anjumaniga barcha turdagi OAV vakillarini taklif etamiz.