Bugungi derbida qanday natija qayd etilishidan qat’iy nazar, Xomyakov "Andijon"nni tark etishi mumkin

Xabaringiz bor, ayni paytda Andijon shahridagi "Sog‘lom Avlod" stadioni "Andijon" hamda "Navbahor" jamoalari o‘rtasidagi "Vodiy derbisi" boshlanishi arafasida turibdi.
Saytimiz xodimlari ushbu uchrashuvni stadiondan bevosita yoritib borish maqsadida Andijon shahriga tashrif buyurgan.

Hozirgacha bizgacha yetib kelgan norasmiy ma’lumotlarga qaraganda, "Andijon" jamoasi bosh murabbiyi Aleksandr Xomyakov bugungi uchrashuv yakuniga yetganidan keyin "Andijon" jamoasini tark etadi.

Bu hali rasman tasdiqlangan ma’lumot emas, lekin katta ehtimol bilan Aleksandr Xomyakovning "Andijon"ni tark etishi kutilmoqda.

Shuningdek, uni Navoiyda "Qizilqum" jamoasi bosh murabbiyligida kutishayotgani haqida mish-mishlar tarqalmoqda.

Klub matbuot xizmatidan bu haqda so‘raganimizda, "Hozir butun diqqat e’tiborimiz bugungi uchrashuvga va chempionatning chiroyli qilib ochilish marosimini tashkil etishga qaratilgan" degan javobni oldik.

Voqealar rivojini kuzatamiz, o‘yindan keyingi matbuot anjumanida yuqoridagi savolga Aleksandr Xomyakovning o‘zidan javob olishga harakat qilamiz.