Бугунги дербида қандай натижа қайд этилишидан қатъий назар, Хомяков "Андижон"нни тарк этиши мумкин

Хабарингиз бор, айни пайтда Андижон шаҳридаги "Соғлом Авлод" стадиони "Андижон" ҳамда "Навбаҳор" жамоалари ўртасидаги "Водий дербиси" бошланиши арафасида турибди.
Сайтимиз ходимлари ушбу учрашувни стадиондан бевосита ёритиб бориш мақсадида Андижон шаҳрига ташриф буюрган.

Ҳозиргача бизгача етиб келган норасмий маълумотларга қараганда, "Андижон" жамоаси бош мураббийи Александр Хомяков бугунги учрашув якунига етганидан кейин "Андижон" жамоасини тарк этади.

Бу ҳали расман тасдиқланган маълумот эмас, лекин катта эҳтимол билан Александр Хомяковнинг "Андижон"ни тарк этиши кутилмоқда.

Шунингдек, уни Навоийда "Қизилқум" жамоаси бош мураббийлигида кутишаётгани ҳақида миш-мишлар тарқалмоқда.

Клуб матбуот хизматидан бу ҳақда сўраганимизда, "Ҳозир бутун диққат эътиборимиз бугунги учрашувга ва чемпионатнинг чиройли қилиб очилиш маросимини ташкил этишга қаратилган" деган жавобни олдик.

Воқеалар ривожини кузатамиз, ўйиндан кейинги матбуот анжуманида юқоридаги саволга Александр Хомяковнинг ўзидан жавоб олишга ҳаракат қиламиз.