O‘zbekistonlik hujumchi Alisher Azizov ikki yildan beri Bangladeshning "Shayx Russel" klubi sharafini himoya qilmoqda.

Jamoaning ushbu mavsumdagi ishlari u qadar yurishmayapti. Jamoa chempionatning dastlabki 6ta turidan keyin 5 ochko to‘plagan holda jadvalda 8-o‘rinni egallab turibdi.

"Paxtakor" tarbiyalanuvchisi hisoblangan Azizov ushbu mavsumda 6ta o‘yinda maydonga tushib, hali gollar hisobni ochganicha yo‘q. "Russel"ning keniyalik murabbiyi Abdul Iddi Salim klubning 3 nafar legionerlari o‘yinidan qoniqish hosil qilmayotgani uchun ikki nafar nigeriyalik futbolchi va Alisherga hayfsan e’lon qildi. Klubning fikricha, legionerlar yomon o‘yin ko‘rsatayotgani uchun jamoaning natijasi pasayib ketgan.

Uch futbolchi esa bosh murabbiy Salimga o‘z sport formalarini yaxshilashga va’da berishdi. Shuningdek, klubning 5 yoki 6 nafar o‘yinchisi jarohat olgani ham natijalar yomonlashishga sabab bo‘lgan.

Alisher Azizov Bangladesh chempionatining o‘tgan mavsumida 24ta o‘yinda maydonga tushib, 1ta gol urgan edi. "Shayx Russel" o‘tgan mavsumda 3-o‘rinni egalladi.