«Bavariya» klubi bosh murabbiy Xans-Diter Flik bilan shartnomani uzaytirganini e’lon qildi. Yangi shartnomaga ko‘ra germaniyalik mutaxassis 2023 yilning 30 iyuniga qadar Myunxenda qoladi.

«Bavariya» Flikning ishidan qoniqish hosil qilmoqda. Jamoa uning qo‘lostida rivojlanmoqda va jozibador o‘yin namoyish qilmoqda. Bu narsa natijalarda ham aks etmoqda. Biz barcha 3ta musobaqada o‘z yurishini davom ettirayotgan Germaniyaning yagona jamoasimiz. Shuningdek, menga jamoaning o‘yin uslubi yoqmoqda. «Bavariya» Flikka ishonadi. Kelajakda o‘z oldimizga qo‘ygan maqsadlarimizga erishishimizga ishonamiz», — deya «Bavariya» boshqaruv kengashi raisi Karl-Xayns Rummeniggening so‘zlaridan iqtibos keltirdi klub rasmiy sayti.

Flik 2019 yilning iyul oyida «Bavariya» bosh murabbiyi Niko Kovachning yordamchisi vazifasiga tayinlangan edi. Noyabr oyiga kelib esa u bosh murabbiy vazifasini bajaruvchi etib tayinlandi.

Germaniya chempionati to‘xtatilgan vaziyatda «Bavariya» ikkinchi o‘rindagi «Borussiya»ni 4 ochko ortda qoldirgan holda peshqadamlik qilmoqda.