Butun dunyoda koronavirus pandemiyasi sababli futbol uchrashuvlari to‘xtatilgan. Jumladan superliga o‘yinlari ham noma’lum muddatga qoldirilgan. Davlatimiz rahbariyati ayni kunlarda bu pandemiyaga qarshi jiddiy tarzda kurashga kirishgan. Ishonamizki, tez kunlarda koronavirus balosi yurtimizni tark etadi hamda yana qiziqarli futbol uchrashuvlari davom ettiriladi.

“Qo‘qon-1912” futbol klubining uy arenasi hisoblangan Qo‘qondagi “Markaziy” stadionida maydon holatini yanada yaxshilash, maydon chimiga agrotexnik ishlov berish jarayonlari esa to‘xtatilgani yo‘q. Kecha “Qo‘qon-1912” klubi rahbari Baxtiyorjon Tolipov “Markaziy” stadionga borib , olib borilayotgan ishlarni nazorat qildilar. Klub prezidenti maydon mutaxassislariga  futbol uchrashuvlari boshlangunga qadar chim holatini yanada yaxshi holatga olib kelish borasida  o‘zlarining maslahatlari va ko‘rsatmalarini berib, ularga maydon uchun kerak bo‘ladigan dori va o‘g‘itlar uchun mablag‘ ajratilishi to‘xtamasligini ta’kidladi.

“Markaziy” stadion maydoni karantin muddati tugagach yanada go‘zal qiyofaga keladi. Biz futbol uchrashuvlari boshlanadigan kunlarni sabrsizlik bilan kutmoqdamiz. Buning uchun esa barchamiz karantin qoidalariga amal qilishimiz lozim bo‘ladi.