“Tur de Frans” ko‘pkunlik velopoygasi nafaqat velosport, balki butun dunyo sporti olamida eng nufuzli musobaqalardan biridir. An’anaga muvofiq, turnir yoz fasining o‘rtasida o‘tkaziladi. Afsuski, koronavirus pandemiyasining butun dunyo bo‘ylab keng tarqalishi sabab bu yilgi musobaqaning o‘tishi so‘roq ostida qolmoqda.

Tashkilotchilar ayni paytda mazkur musobaqani qanday qilib bo‘lmasin o‘tkazib olish bo‘yicha bosh qotirishmoqda. Reglamentga ko‘ra, bu yilgi bahslar 27 iyun – 19 iyul kunlari orasida o‘tishi belgilangan edi. Butun dunyoda karantin holati joriy etilgani sabab musobaqaning bu yilgi bahslari ushbu kunda o‘tishi deyarli imkonsiz. Shu bois tashkilotchilar uni keyinroqqa ko‘chirish haqida o‘ylashyapti.

Yevropa nashrlarining xabar berishicha, tashkilotchilar musobaqani qoldirish haqida sira o‘ylashgani yo‘q. Bu borada yakuniy qaror may oyida e’lon qilishi kutilmoqda.

Eslatib o‘tamiz, musobaqa bo‘lib o‘tadigan Fransiya mamlakatining o‘zida koronavirus infeksiyasiga chalinganlarning o‘zi 109 mingdan oshgan bo‘lib, ularning 13 mingdan ziyodi hayotdan ko‘z yumgan.