Moskvaning "Spartak" va Rossiya terma jamoasi sobiq hujumchisi Roman Pavlyuchenko moskvaliklar tarkibida ijarada o‘ynayotgan Dortmundning "Borussiya" klubi futbolchisi Andre Shyurrlening transferini sotib olmaslikka qilgan qaroriga munosabat bildirdi.

"Spartak" uchun Shyurrle hech narsa qilgani yo‘q. To‘g‘ri, u Jahon chempioni, jamoada yetakchi bo‘lishni xohlagandi, hamma undan shu narsani kutgandi. U bo‘lsa buni uddalay olmadi.

Undan "Spartak" klubiga foyda bo‘lmadi. Nega? Faktorlar ko‘p, u nima uchun Rossiyaga kelganini bilmaymiz-ku?! Balki, u uchun birinchi o‘rinda pul bo‘lishi mumkin. Uning qandaydir foydasi tekkan bo‘lishi mumkin, lekin juda kam.

Men boshqa chempionatlarda o‘ynagan Shyurrleni Rossiyada ko‘rmadim. Avvalgi Shyurrledan asar ham qolmadi. Jamoa u bilan yaxshi o‘ynamadi.

Bizning chempionat shunaqa: hatto Ronaldu va Messilar kelib, o‘ynab keta olmasliklari mumkin. Ular Yevropada boshqa futbolchilar, bu yerga kelsa umuman boshqa futbolchilarga aylanib qolishadi", - dedi Pavlyuchenko.

Shyurrlening transferini sotib olish uchun "Spartak" 7 million yevro to‘lashi kerak edi. Shyurrlening "Borussiya" bilan tuzilgan shartnomasi 2021 yilning yozigacha mo‘ljallangan.