Italiyaning Tuttosport nashri «Yuventus»ning so‘nggi 25 yildagi eng yaxshi futbolchisini aniqlash maqsadida o‘z mushtariylari orasida so‘rovnoma o‘tkazdi.

So‘nggi 25 yillikda turinliklar safida to‘p surgan 16 nafar yulduz futbolchi sakkizta juftlikka ajratildi. So‘rovnomada kutilganidek Alessandro del Pyero g‘alabaga erishdi. Yarim himoyachi finalda 93 foiz ovoz to‘plab, chexiyalik sobiq jamoadoshi Pavel Nedvedni ortda qoldirgan.

Yarim finalga qadar 2011—2015 yillar davomida «Yuventus»da to‘p surgan «Inter» va «Milan» sobiq yarim himoyachisi Andrea Pirlo ham yetib keldi. Pirlo ¼ finalda Krishtianu Ronaldudan ustun keldi. Shuningdek, yarim finalga qadar himoyachi Jorjio Kyellini ham yetib kelgan.

So‘rovnomaning ilk turidayoq Zayniddin Zidan, Edgar Davids, Zlatan Ibragimovich, Pol Pogba va Karlos Teves kabi yulduzlar chiqib ketdi.

Del Pyero «Yuventus»da 1993—2011 yillarda faoliyat yuritgan. U jamoa safida 706 o‘yin o‘tkazib, 290 ta gol va 81 samarali uzatma muallifiga aylangan.